जेनजी आन्दोलनका क्रममा फरार कैदी पक्राउ

मर्स्याङदी समाचार,५ कात्तिक

जेनजी आन्दोलनका क्रममा कास्की कारागारबाट फरार भएका जबर्जस्ती करणी उद्योगसम्बन्धी मुद्दाका एक कैदीलाई प्रहरीले पक्राउ गरेको छ ।

पक्राउ पर्नेमा लमजुङको राइनास नगरपालिका–९ स्थायी घर भएका अमृतबहादुर अधिकारी रहेका छन । जिल्ला प्रहरी कार्यालय लमजुङका अनुसार उनलाई बुधबार बेँसीशहर नगरपालिका–२, भकुण्डे क्षेत्रमा हिँडिरहेको अवस्थामा फेला पारी पक्राउ गरिएको हो ।

अधिकारीलाई लमजुङ जिल्ला अदालतले पाँच वर्ष छ महिना कैद र तीन लाख ५० हजार रुपैयाँ जरिवाना हुने फैसला सुनाएको थियो । अदालतको फैसलाअनुसार कैद भुक्तान गरिरहेका उनी जेनजी आन्दोलनका क्रममा गत भदौ २४ गते कास्की कारागारबाट फरार भएका थिए ।

फरार कैदीको खोजतलास गर्ने क्रममा प्रहरीले अधिकारीलाई पक्राउ गर्न सफल भएको जिल्ला प्रहरी कार्यालय लमजुङले जनाएको छ । पक्राउपछि आवश्यक कानुनी प्रक्रिया पूरा गरी उनलाई बाँकी कैद भुक्तानका लागि पुनः कास्की कारागार पठाइएको प्रहरी निरीक्षक नेत्रबहादुर थापाले जानकारी दिनुभयो ।