सुन्दरबजारमा दियोबाट आगलागी, एक लाख रुपैयाँको क्षति

मर्स्याङदी समाचार, ४ कार्तिक

लमजुङको सुन्दरबजार नगरपालिका–६ खत्रीठाँटीमा दियोबाट आगलागी हुँदा करिब एक लाख रुपैयाँ बराबरको क्षति भएको छ । स्थानीय सुकमाया श्रेष्ठको दुईतले पक्की घरको भान्साकोठा भित्र बालेको दियोबाट सोमबार साँझ अचानक आगलागी भएको हो ।

आगलागी भएको सूचना साँझ ७ बजेर ३५ मिनेटमा प्राप्त हुनासाथ इलाका प्रहरी कार्यालय सुन्दरबजार र इलाका प्रहरी कार्यालय भोटेओडारबाट प्रहरी टोली घटनास्थलमा खटिएको थियो । प्रहरी र स्थानीयको सहयोगमा आगो लागेको १५ मिनेटभित्रै आगो पूर्ण रुपमा नियन्त्रणमा लिइएको प्रहरीले जनाएको छ ।

आगलागीबाट भान्साकोठा भित्र रहेका भाँडावर्तन तथा फर्निचरका सामान जलेर करिब एक लाख रुपैयाँ बराबरको क्षति भएको छ । घटनामा मानवीय तथा चौपाय क्षति भने नभएको प्रहरीले जनाएको छ ।